مساء الخير .....
طبعا تابعتم اللي حصل آخر كام مسيرة أو مظاهرة بداية من العباسية 23 يوليو واللي حصل اللي أدى لإستشهاد محمد محسن. وماسبيرو 9 أكتوبر والمجزرة اللي حصلت.
أنا مش هتكلم عن المجلس اﻷعلى لإجهاض الثورة بالقوات المسلحة.
عايز أتكلم عن حاجة تانية كانت موجودة بس إحنا اتعاملنا معاها على إنها عادي.
البلطجية.
يوم 23 يوليو إحنا خرجنا بشهيد لكن السيء إننا أتهزمنا قدام البلطجية بعد الإنتصار الساحق في موقعة الجمل.
إحنا أتكسرنا ودي حقيقة.
هما أتعلمو يجرونا لملاعبهم ومناطقهم اللي هم عارفينها جدا جدا. إتعلموا يورطوكم مع أهل المنطقة نفسها ويبان ان في اشتباكات مع أهل المنطقة فكل الناس بتنزل تساند أخواتهم.
مش مطلوب مننا على ما أعتقد إننا نشكل ميليشيات تردع البلطجية ، إحنا نقدر بس ده مش الحل.
في بوليس وجيش المفروض مهمتهم مواجهة العناصر المسلحة المخالفة للقانون (البلطجية) بس زي ماانتو عارفين ان العناصر المسلحة كلها تحت قيادة المجلس اﻷعلى للقوات المسلحة.
أعتقد أن الخطر أن إحنا كثوار بنتهزم بإرادتنا قدام العناصر دي.
اللي خايف على نفسه واللي خايف على أخته اللي معاه أو الناس اللي في المسيرة. ما بالكم لو ناس نازلة إنتخابات فرادى أو بعائلاتهم. هيعملو إيه خصوصا مع وجود اللجان الشعبية اللي اتقنن وضعها اللي طبعا هتبقى عناصر مسلحة بلطجية.
من تعريف الجنون هو تكرار نفس الخطأ وانتظار نتائج مختلفة عما سبق صحيحة.
لازم يكون في حلول جذرية. منها تطهير الداخلية اللي خايفين لو بدأ اﻷصلاح فيها البلد تنهار في حين إن أصلا مفيش داخلية.
في مجموعات مقنن وضعها بتقود البلطجية.
هحاول أكون إيجابي وأطرح حلول شايفها منطقية من وجهة نظري وطبعا ليكم الحق في تبنيها أو ﻻ.
- لازم المسيرات والوقفات يبقى ليها قائد عارف رايح فين ومنين مش أي هتيف يحركنا وراه لمصيدة معدة مسبقا.
- لازم المسيرات تبقى منظمة نفسها بشباب قدام خالص وشباب في الآخر لحماية اﻷهالي اللي بيبقوا معانا في المسيرة.
- لازم قبل ما نطلع بمسيرة نحشدلها من مكان التجمع نحشد من مكان ما إحنا رايحين عن طريق زمايلنا الثوار من أهل المنطقة.
- لازم يعرفوا الناس ان في مسيرة سلمية جاية ضيوف عليهم ويفهموهم ليه المسيرة دي وأيه أهدافها، لازم يبقى في وعي والله قابلينا الناس نروح مش قابلينا نفكر في بدايل.
- لازم نجبر الشرطة تقوم بدورها أنها وإحنا ماشيين تبقى هي الكردون مش إحنا ولازم نتعامل مع الوضع القائم حتىتصحيحه.
أما بقى بالنسبة للإنتخابات... أعتقد إننا لازم نبدأ من إمبارح نكون لجان شعبية بجد تضم واحد من كل شارع على اﻷقل عارف أهل الشارع وعارف اللجنة اللي رايحينها يأمن وجودهم ودخولهم. ومع ذلك أنا شايف ان الإنتخابات برمتها تكرار لخطأ عملناه 30 سنة ومستنيين نتيجة كويسة منه.
مجلس الشعب والدستور لا هيحميني ولا يغطيني ولا في مصلحة بينه وبيني.
الديموقراطية والإنسانية هي الحل..
