الشعب والجيش ايد واحدة .. أنهي إيد لا مؤاخذة

تحت شعار الشعب والجيش ايد واحدة- وليس الجيش والشعب - حيّدنا قوات الجيش التي نزلت ميدان التحرير ليلة الجمعة 28 يناير 2011 .

اللي هيخليني اتجنن إزاي الشعار بقى الجيش قبل الشعب , عمل ايه الجيش ؟ إستخبى في الثكنات واستنى لما يشوف مدبحة الثورة هتختم بإيه ! مبارك انتصر عاش الملك ولو الثورة, عاشت الثورة . كان فين رجالة الجيش وشرفائه ودمنا مش عالرصيف لأ على الأسفلت .

وإذ فجأة خرجت المجنزرات والمدرعات ومفرقتش كتير عنها وهي في الثكنات , وقفوا يتفرجوا .

إيه الطيبة والسذاجة دي يا شعب .

بسهولة كده تفرط في دم ولادك وتدي الحكم لأقرب جلاد .

بسهولة كده نفسك إتقطع وطالب ترجع الزنزانة ويغيرولك ادهان .

بس سيبنا من الجيش الاول ولا الشعب وخلينا في المهم .... إيد واحدة . طبعا واحد من رجالة القذافي هيقوللي حرام- ايد الواحدة عورة - ذي قرار تبني مجلس الامن كده .

بس لأ أنا عايز أعرف انهي إيد

الإيد اللي أهانت مصري وعذبته وقتلته من التعذيب ولا اللي تعبت فكملت عليه بالبيادة

ولا اللي ضربت عالرجالة رصاص وجريت وراهم بالصواعق .

ولا اللي وزعت المية على غوغاء بيسبوا الرموز الدينية .

ولا اللي اتعدت على رهبان عزّل عشان تهد سور برصاص وقذائف .

ولا الايد البطالة اللي معملتش حاجة والناس بتدّبح في بعض طول الليل .

ولا الايد اللي بتنزل وتسيب أي حد يهدم أي دور عبادة .

 ولا الإيد اللي كشفت على بنات مصر اللي كانوا بميت راجل في الميدان وقت ما رجالة الجيش كانوا بيشخروا في الثكنات . الإيد اللي بدل ما تساعد وتستر فضحت . الإيد اللي انتهكت شرف المصريين جميعا .

بصراحة مش لاقي نفس أٌقول بيها إيد واحدة .

مفيش حل ولا أمل غير إن الشعب المصري يكون إيد واحدة ضد الفساد ولو كان مجلس حكام مش حاكم .